03/12/10

講真，陳志雲俾人拉，我真係一路食住花生等睇戲。

見到網上既言論，就知道大家有幾痛恨佢 - 窒礙歌手發展，用人唯親，將新聞自主權拱手相讓俾北京等...但係偏偏佢就可以呼風喚雨，隻手遮天，繼續坐擁洗香港市民腦裝既權力。而家佢俾人拉，情況就好似阿嬌果陣咁，一次過還清佢地欠下香港市民既債 - 包括邪惡，貪婪，虛偽既罪孽。出得黎行，就預左要還。你還緊錢俾我，我真係卻之不恭。

話時話，唔知幾時香港人無論係八十後又好，師奶又好，中環友都好，都特別鐘意睇名人仆街。諗到最早既例子，都應該係謝霆鋒頂包案。無他既，一個聲稱公平競爭既社會，有D人比其他人更加公平，更易上位，更易賺大錢，大家見到咁既現象，但係連一D改變呢種現象既力氣都無。一向都咁「精」既香港人，有能力既就一早移民走人洗底，無能力既就默默留o係香港啞忍。大家既目標都係一樣 - 希望有朝一日，由俾人踩果個變做踩人果個。

所以大家見到瀕臨絕種的社會公義 (i.e. 抄陳振聰家，拉陳志雲飲咖啡) 時，就好似見到中華白海豚咁，wee嘩鬼叫，全城亢奮。潛台詞係，亢奮過後，大家繼續做奴隸，唔好諗住個社會會因為咁而變好。作為香港人，要好好珍惜呢D 一年得幾劑既嗎啡、K仔，如果唔係，香港人既生活真係悲哀。