幾時開始 , 香港人再唔專重現有既制度 , 下下只係利益行頭 , 當利益跟制度有衝突時 , 點解會係利字行先 ? 起高鐵好呀 , 不過點解當中有咁多細節無諗過 , 就要霸王硬上弓通過? 港珠澳大橋都好呀 , 不過點解政府方案過唔到環境評估 , 大家唔係罵政府 , 而係罵揭露政府方案不足既人? 賓賓想爭取居港權 , 無人話之前起草基本法班人有問題 , 反而走去話幫菲傭班人係「政棍」「港賊」。親政府班人開始識得用語言蠱惑人心 , 最近聽到既一個詞 , 叫「法盲」。法盲有乜唔妥? 高等法院門外果個人像 (拿住天秤果個呢) , 佢唔係盲 , 而係特登綁住自己雙眼添 !
幾時開始 , 香港人被廣告 / 無線電視劇洗腦洗到個個都當正自己係中產 ? 就連以前最草根既大家樂 , 而家去食個快餐 , 都要食乜鬼「南冰洋魚柳」 (英文譯作 fish fillet) , 「新西蘭爵士牛」(英文譯作 sirloin steak) ? 出街食飯 , 又要去乜春米芝蓮星級餐廳先矜貴 ? D人以為自己中產 , 以中產既價格消費 , 但係行為又一 D 都唔中產。最緊要係 , 大把人搵既錢根本唔係中產水平 , 但係又肯俾幾千蚊買部iPhone 加 幾百蚊月費 ; 俾幾百蚊食米芝蓮 , 只係為左係 facebook 打卡同人講自己去左米芝蓮餐廳食野 !
呢篇野唔出得去第二度 , 一來純屬發泄無乜篇排 , 二來費事四處樹敵...
(p.s. 我呢個星期已經俾盧巧音隻《天演論》洗哂腦)
沒有留言:
張貼留言